Burrë e grua, në garë për tender

Burrë e grua, në garë për tender




Marrëveshjet mes vete, planet paraprake kanë shkuar deri në atë masë sa që burrë dhe grua kanë hapur kompani të ndryshme për t’u futur në garën e njëjtë duke bërë shkelje ligjore vetëm e vetëm që njëri nga ata ta fitojë tenderin. Në tenderin për “Unifikimin e mbishkrimeve mbi emërimet e lagjeve, rrugëve dhe shesheve” në Gjilan, tenderi iu dha burrit edhe pse kompania e gruas kishe çmim më të ulët, por nuk plotësonte kriteret e tjera.

Kjo lojë, ndonëse e bërë me një qytet të vogël, ka nxjerrë fitues kompaninë “Viva Print”, me pronar Skender Imerin, i cili kishe bërë fushatën parazgjedhore të PDK-së. Gruaja e tij Feime Imeri, pronare e kompanisë “Orel”, kishte ofruar çmimin më të vogël për mbi 17 mijë euro sesa kompania fituese e burrit të saj. Skender Imeri, bashkëshorti i Feime Imerit pronare e kompanisë “Orel”, thotë se të qenit bashkëshort nuk ka ndikuar që të kurdiset çmimi.

“Jo. Nuk ka pasur ndikim në rregullimin e çmimit në tender” ,ka thënë ai. Ndërkohë që arsyetimi zyrtar i KK të Gjilanit për mosdhënien e tenderit firmës Orel ka qenë se ajo nuk i plotëson kriteret.

Mirëpo, kompania “Orel” vetëm një javë më herët kishte fituar tenderin për “Mirëmbajtjen e ndriçimit publik”, në vlerë afro 52 mijë euro me të gjitha dokumentet e kompletuara, ndërsa nga tenderi paraprak u eliminua për mungesë të dokumenteve.



Shkelje ligjore

Hasan Preteni, kryetar i Agjencisë Kundër Korrupsion (AKK), ka thënë se nëse ka elemente të tilla, të tenderimit nga një pronar i njëjtë, gjithsesi do të ketë hetim dhe nuk do të ketë as një përjashtim.

Që ndalohet burrë dhe grua të ofertojnë në të njëjtin tender, këtë publikisht e ka thënë edhe Mursel Racaj, kryetar i Agjencisë Kosovare për Prokurim Publik (APP).

Sipas tij, është e paligjshme që firma në pronësi të të njëjtit individ të konkurrojë për një tender, sepse mund të çojë te rregullimi i çmimit.

“As një person nuk mund të jetë i përfshirë në dy kompani kur aplikohet për një tender publik,” pati thënë ai për “Prishtina Insight”.

Ndërkaq, kryetari i komunës së Gjilanit, Qemajl Mustafa, deklaroi edhe njëherë se do të ndërpresë çfarëdo lloj kontrate që është e jashtëligjshme.

“Gjithçka që gjendet jashtë ligjit nga prokurimi publik, atë lloj kontrate e çfarëdo lloji që të jetë do ta ndërpres” ka ritheksuar Mustafa.

Ndryshe, të shtunën e kaluar “Zëri” ka raportuar se kompania “Viva Print”, e cila i ka bërë fushatën zgjedhore kryetarit të komunës së Gjilanit, Qemajl Mustafa, e kontraktuar nga PDK-ja, ka fituar një tender prej mbi 132 mijë euro në këtë komunë, edhe pse për të njëjtin tender ka pasur ofertë me çmim më të ulët.

Kjo kompani ka fituar tenderin për “Unifikimin e mbishkrimeve mbi emërimet e lagjeve, rrugëve dhe shesheve” me 13 maj të këtij viti, ku pas këtij shkrimi Komuna e Gjilanit ka dërguar edhe reagim i cili nuk hedh poshtë këto fakte, por megjithatë është botuar ai reagim.



Prokurimi mund të hetojë

Ndonëse zyrtarë të Prokurimit të komunës së Gjilanit nuk kanë pranuar se mund të bëjnë një hetim paraprak për afërsinë e pronarëve që ofertojnë në të njëjtin tender, duke thënë se këtë nuk ua lejon ligji, në Komisionin e Prokurimit Publik (KRPP) e thonë të kundërtën.

Në KRPP nuk e mohojnë faktin që zyrtarët e prokurimit kanë të drejtë të bëjnë hetim dhe atë sipas ligjit të prokurimit publik (LPP).

Ata pohojnë se Autoriteti Kontraktues ka mundësi ta identifikojë se a është i njëjti pronar i OE-së në bazë të dokumentacionit të kërkuar si te: certifikatat e biznesit, vërtetimet nga Administrata Tatimore, numri fiskal, etj.

“Nëse edhe në këto dokumente nuk janë të qarta, zyrtari i prokurimit ka të drejtë që t’i drejtohet Ministrisë së Tregtisë dhe Industrisë , Administratës Tatimore dhe të gjitha institucioneve tjera ku ka nevojë, në mënyrë që të sigurohet dhe të verifikojë se a është i njëjti pronar i OE në fjalë”, deklarojnë zyrtarë të KRPP-së.



Haziri: Investim i panevojshëm

Lutfi Haziri, ish-kryetar i komunës së Gjilanit, ka thënë se tenderi për “Unifikimin e mbishkrimeve mbi emërimet e lagjeve, rrugëve dhe shesheve”, është i panevojshëm.

Ai ka thënë se ka parë planin komunal dhe se sipas tij, kjo punë është e kryer tashmë. Për më shumë ai thotë se kjo është vetëm një shpërblim për kontraktorin e PDK-së.

“Kjo ka të bëjë me interesa partiake me buxhet të Komunës së Gjilanit”, ka thënë Haziri