ME RAMAZAN EDHE NË OLIMPIADË

ME RAMAZAN EDHE NË OLIMPIADË





Sportisti i lundrimit nga Egjipti, Ahmed Habash e ka treguar mënyrën se si do të veprojë ai dhe si duhet të veprojnë qindra pjesëmarrësit e fesë islame në Lojërat Olimpike të Londrës. Ai do ta mbajë në orën e tij kohën egjiptiane.

Muaji i shenjtë i Ramazanit është njëra prej periudhave më të rëndësishme në kalendarin islam. Muaji i agjërimit ka nisur të premten, kur myslimanët nga mbarë bota heqin dorë nga ushqimi dhe pija, nga mëngjesi deri në mbrëmje.

Kjo do të shkaktonte problem të theksuar tek atletët dhe si Habash, ashtu edhe sportistët e tjerë egjiptianë, e kanë marrë lejen nga Këshilli më i lartë islamik egjiptian që të mos agjërojnë gjatë ditëve kur kanë gara. Ai do t’u bindet rregullave, por do të agjërojë në bazë të kohës egjiptiane.

“Unë nuk mund të ha gjatë ditës. Mund të ha vetëm pasi të perëndojë dielli. Mirëpo, unë e kam zgjedhur një mënyrë më të shpejtë, duke agjëruar në kohën egjiptiane, e cila i bën punët më të lehta”, theksoi Ahmed, i cili do të garojë në flotën RS-X.

Perëndimi i diellit në Kajro korrespondon me orën 18:00 në Weymouth të Britanisë së Madhe, ku është vendosur ky sportist, që do të thotë se Habash nuk duhet të presë shumë, pas një dite të vështirë në ujë.

“Gjatë garave, nuk do të agjëroj, por kjo nënkupton se kur të rikthehem në shtëpi, do t’i zëvendësojë pesë ditët që do ta prish agjërimin”, shtoi ai.

Zëdhënësi i ekipit algjerian, Mohammed Azzoug thotë se nuk ka ndonjë rregull rreth agjërimit për sportistët. “Është një gjë personale. Ne vetëm ua kemi dhënë informatat bazike dhe ata i marrin në fund vendimet. Nuk jam i sigurt se çka po mendon ky djalosh egjiptian. Imagjinojeni nëse ai do të ishte në Australi, do të ishte krejt ndryshe nga ajo që supozoni të bëni”, deklaroi Azzoung për agjencinë Reuters.

Ndërkaq, vrapuesi i garës për 1,500 metra, Mohamed Mohamed Hassan nga Somalia, nuk po ndihet rehat. “Është një muaj i bekuar. E kam pritur këtë muaj qe 11 muaj, është muaj të cilin jemi të nderuar që e presim. Si sportist, mund të të shkaktojë vështirësi, por jam i gatshëm të agjëroj dhe të ushtroj, duke i përballuar vështirësitë që do të shfaqen gjatë këtij muaji”, tha Hassan, para ceremonisë hapëse.

Shoku i tij i skuadrës, Zamzam Mohamed Farah, po ashtu i vendosur në Fshatin Olimpik, në jug të Londrës, e ka të njëjtin mendim. “Është një çështje fetare. Unë jam duke agjëruar dhe nuk mendoj se kjo do të ndikojë tek unë”, nënvizoi Farah.

Organizatorët e ‘Londrësa 2012’ thonë se kanë filluar furnizimet me ushqim për 3,500 sportistët që agjërojnë, që nga orët e para të mëngjesit, e deri në ora 21, çdo ditë. Furnizimi me ushqim për 24 orë për sportistët në Fshatin Olimpik do të thotë se ata do të jenë të aftë të hanë në orët e vona të mbrëmjes, duke filluar nga ushqimi i shpejtë, që përfshin ujin, pijet energjike dhe frutat.

Po ashtu, janë në dispozicion edhe hapësira multifetare, ku sportistët mund t’i bëjnë lutjet e tyre të përditshme. Madje, në këtë hapësirë jetojnë 250 mijë myslimanë, të cilët e kanë mirëpritur muajin e shenjtë të Ramazanit të premten.

Mijëra sportistë myslimanë dhe familjarë të tyre pritet t’i vizitojnë xhamitë gjatë javëve të ardhshme për lutje dhe për aktivitetet e Ramazanit. “Këtë vit presim një numër të madh të njerëzve që të trokasin në dyert tona. Sot është dita e parë dhe i tërë vendi është i mbushur”, ka thënë Salman Farsi, zëdhënës i xhamisë së Londrës Lindore.

Yahya Alkasmiyah, me prejardhje nga Banglladeshi, i cili punon për bamirësi, mendon se sportistët duhet të agjërojnë edhe gjatë aktiviteteve sportive që do t’i kenë. “Ky është një gjykim individual. Por, unë nuk mendoj se Olimpiada është një arsye aq bindëse që të vendosësh të mos agjërosh. Ka njerëz që po i kryejnë me sukses sfidat para Olimpiadës. Mendoj se Ramazani e ngre moralin e sportistëve dhe u jep atyre mbështetje”, tha ai.

Zëdhënësi i ekipit algjerian, Mohammed Azzoug thotë se në dhomat e sportistëve në Fshatin Olimpik nuk ka shenja se si të drejtohen kah Meka, kur të falen, por shton se ky nuk është një problem, sepse secili tash ka iPhone dhe mund ta gjejë shumë lehtë drejtimin e ‘Kiblës’/