Holanda ndalon nikabin në vende publike

Hagë – Qeveria holandeze, qeveri e njërit prej popujve më të ngrohtë
të Europës dikur, morri vendimin për ndalimin e mbulesës së fytyrës të
femrave muslimane, në mes të një vale të re kufizimesh dhe ndalesash
ndaj emigrantëve me pretendimin se ato bien ndesh me ‘stilin holandez të
jetesës’.

“Një ndalesë e përgjithshme mbi veshjet që mbulojnë fytyrën është në
përgaditje e sipër,” njoftoi Ministria e Punëve të Brendshme në një
deklaratë pas një takimi të kabinetit, siq raporton Agence France Presse
(AFP) të premten, më 16 shtator.

“Ligji i propozuar do të ndalojë mbajtjen e mbulesës së fytyrës
(nikabit) në vende publike si: ndërtesa publike, institucione arsimore,
spitale dhe transport publik.”

Kjo ndalesë nuk do të aplikohet në aeroplane dhe për udhëtarët kalimtarë nëpër Holandë.

Ky hap i ri nga ana e qeverisë holandeze për të vendosur këtë ndalesë
është parë si një përpjekje për të joshur partinë e krahut të djathtë
ekstrem, Partinë e Lirisë (PVV) të politikanit anti-Islam Gert Wilders.
PVV-ja është partia e tretë më e madhe në parlament, dhe është një
mbështetje e madhe për koalcionin minoritar udhëheqës të përbërë nga
partia liberale WB dhe Partia Demokristiane (CDA).

Edhepse me këtë marrëveshje (për koalicionin qeverisës në mes të dy
partive të lartpërmendura) partia e Wilders-it mbeti jashtë qeverisë,
pozicioni i qeverisë aktuale ka qenë mjaft i ashpër ndaj Islamit dhe
imigrimit nga vendet joperëndimore (për shkak të përkrahjes nga partia e
Wilders-it).

“Qeveria beson se të veshurit e mbulesës së plotë, ose pothuajse të
plotë, të fytyrës, bie në kundërshtim fundamental me jetën publike ku
njerëzit njihen sipas fytyrave të tyre,” shtoi deklarata e qeverisë.

“Veshjet që mbulojnë fytyrën e pengojnë një gjë të tillë (pra njohjen e
njerëzve sipas fytyrës) dhe janë në kundërshtim me bazat e barazisë në
mes meshkujve dhe femrave, e sidomos femrave.”

“Ndëshkimi për shkelësit e kësaj ndalese do të jetë në formë të
gjobitjes me të holla,” u tha në deklaratë, pa u zbuluar shuma e
gjobitjes.

Sipas disa vlerësimeve, shuma pritet të jetë jo më e lartë se 380 euro.

Pasi që koha kur do të hyjë në fuqi ky ligj nuk është caktuar ende,
Wilders, i cili e ka kërkuar këtë ligj që nga viti 2007, pati thënë më
herët se shpreson që ndalimi i burka-s të hyjë në fuqi qysh në fillim të
2012-s.

Liria fetare

Qeveria tha se nuk e konsideron ndalesën e nikabit si kufizim te lirive fetare.

Ishte “e nevojshme dhe e justifikuar në interes të mbrojtjes së
karakterit dhe stilit të jetës në Holandë”, u shpreh në deklaratën e
saj, qeveria.

Islami e sheh mbulesën si një mënyrë veshjeje të obligueshme, e jo vetëm
si një simbol fetar që tregon bindjet fetare të një personi.

E sa i përket nikabit, shumica e dijetarëve islamë besojnë se gruaja nuk
është e obliguar të mbulojë duartë dhe fytyrën e saj. Por, ata besojnë
që vendimi mbi vendosjen e nikabit u takon atyre.

Përveç propozimit për ndalimit të nikabit, kryeministri Mark Rutte
gjithashtu paralajmëroi rregulla më të ashpra ndaj imigrantëve dhe
azil-kërkuesve që kërkojnë shtetësi holandeze.

Këto kufizime të reja do të kërkonin që imigrantët të kenë fituar të
ardhura për tri vite dhe të mos kenë përfituar nga ndihmat sociale apo
beneficione të tjera.

Muslimanët, prej të cilëve shumica me prejardhje turke dhe marokene, përbëjnë 1 milion të popullatës 16 milionëshe të Holandës,.

Sipas Radio Holanda, vlerësohet se rreth 150 gra mbajnë nikab kur dalin në publik.

Kreu i Policisë së Amsterdamit, Bernard Welten, fitoi simpati tek
muslimanët holandez kur deklaroi se ai nuk do t’i urdhëronte oficerët e
tij që të arrestonin apo dënonin gratë që veshin nikab, edhe nëse
qeveria do ta miratonte këtë ndalesë.

Mbajtja e nikabit është bërë temë mjaft e ndjeshme nëpër të gjithë Evropën.

Kjo veshje, e mbajtur nga gratë muslimane, veçse është ndaluar në Francë, Belgjikë dhe në një qytet të Spanjës.

Përktheu: Ebu Muslim

http://www.realitetiislam.net/