Lugina pa përkrahjen e Prishtinës për ndarje

Lugina pa përkrahjen e Prishtinës për ndarje



Kosovë


Lugina pa përkrahjen e Prishtinës për ndarje




Prishtina zyrtare nuk do që t’u përzihet shqiptarëve që jetojnë në jug të Serbisë lidhur me atë se a të bëhen ata të pavarur nga Serbia apo jo. “Parimi im është ky: shqiptarët kudo që janë, qoftë në Shqipëri, qoftë në Kosovë, qoftë në Maqedoni, qoftë në Preshevë, nuk mund ta luajnë rolin e paternalitetit as të babait e as të nënës, ne jemi vëllezër dhe vëllezër as më të mëdhenj e as më të vegjël, por të barabartë dhe në këtë drejtim secili e ka politikën e vet”, ka thënë zëvendëskryeministri i Kosovës, Hajredin Kuçi. “Kosova është për respektimin e plotë të kufijve ashtu sikur janë sot, është për integrime evropiane, për bashkëpunim rajonal dhe jo për ndryshime që gjenerojnë kriza”, ka shtuar ai.

Zëvendëskryeministri i Kosovës për punën e pavarësisë së shqiptarëve të jugut të Serbisë ka folur të mërkurën pas paralajmërimeve të tyre se kanë për ta ndërmarrë hapin e mëvetësimit nga Serbia paralel me serbët e veriut të Kosovës, të cilët e kanë paralajmëruar një gjë të tillë këtyre ditëve.

Kuçi ka këshilluar shqiptarët e tri komunave në jug të Serbisë që të mos veprojnë me inercion. “Nga pozita e zëvendëskryeministrit të Kosovës i porosis shqiptarët kudo, edhe në Preshëvë: politikë me inercion nuk duhet të bëjmë”, ka thënë ai. “Ne ndihmojmë (shqiptarët që jetojnë në Serbi v.j.) në interesa të përgjithshme nacionale, por ne i ftojmë ata që të punojnë shumë me faktorin ndërkombëtar, të ruhen të drejtat e tyre nacionale, kombëtare dhe njerëzore dhe të punojmë të gjithë për një integrim në Unionin Evropian”. Sipas zëvendëskryeministrit kosovar, Prishtina zyrtare asnjëherë nuk u premton as shqiptarëve të Preshevës, Medvegjës dhe Bujanocit dhe as të tjerëve në rajon gjëra të cilave më pas nuk mund t’u dalë zot.

I pari lider i shqiptarëve të jugut të Serbisë që e ka përmendur idenë e mëvetësisë nga ky shtet si kundërpërgjigje të serbëve të veriut të Kosovës ka qenë kryetari i Komunës së Preshevës, Ragmi Mustafa. “Duhet të kërkojmë zgjidhjen më fatlume për shqiptarët që të jenë pjesë integrale e Republikës së Kosovës”, ka thënë Mustafa për TV Klan Kosova. “Nëse serbët e veriut shpallin pavarësinë, atëherë ne në Luginë do ta bëjmë të njëjtën gjë në mënyrë reciproke”.

Pos Mustafës ka folur edhe kryetari i Komunës së Bujanocit, Jonuz Musliu. Ai ka thënë se është i pashmangshëm bashkimi i Luginës së Preshevës me Kosovën, ngase, sipas tij, pjesëmarrja e shqiptarëve në jetën institucionale në Serbi “është e ngadalshme dhe e sikletshme”.

“Një politikë e tillë diskriminuese e Beogradit ndaj shqiptarëve, para 11 vjetësh solli frymën luftarake në Luginën e Preshevës, ku shqiptarët të mllefosur ngjeshën amët dhe u vunë në mbrojtjen e pragut të shtëpisë, të nderit dhe të dinjitetit të tyre”, ka thënë Musliu për portalin Presheva.com, për të shtuar se e njëjta gjendje po përsëritet, por me metoda të reja politike.“E drejta jonë historike dhe politike për bashkim me Kosovën është e drejtë legjitime e konfirmuar me verdiktin e popullit të shprehur në referendumin e vitit 1992 dhe me luftën çlirimtare të UÇPMB-së. E kemi thënë disa herë se nuk ka zgjidhje tjetër përveç reciprocitetit në mes veriut të Kosovës dhe Luginës së Preshevës”.

Politikani i parë serb që përmendi idenë e shpalljes së pavarësisë së Kosovës veriore qe sekretari në Ministrinë për Kosovën në Qeverinë e Serbisë, Oliver Ivanoviq, javën e kaluar. “Në Kosovë ka shumë serbë që janë duke menduar në këtë drejtim. Unë tani nuk do të hyj në detaje, sidomos kur mendoj se ideja është e keqe”, ka thënë ai për Press. “Me rëndësi është që bashkësia ndërkombëtare ta ndalë presionin mbi serbët e Kosovës, se në të kundërtën shpallja e pavarësisë së Kosovës veriore është çështje ditësh”.

Zëvendëskryeministri i Kosovës, Hajredin Kuçi, e ka ritheksuar të mërkurën edhe qëndrimin e Prishtinës zyrtare kundrejt një paralajmërimi të tillë. “Serbët që paralajmërojnë gjëra të tilla janë njerëz ilegalë, veprimet e tyre janë ilegale, ata duhet të kthehen, siç thotë populli, mbarë, të bashkëpunojnë me institucionet vendore dhe ndërkombëtare, t’u besojnë këtyre institucioneve dhe të mos krijojnë iluzion, i cili krijon kriza për ata, për të ardhmen e tyre dhe stagnon zhvillimin e atyre dhe të asaj pjese”, ka thënë ai.